ધરતી વિકાસ મંડળ પાટીદાર સમાજના તેના પરંપરગત રૂઢિગત ખ્યાલોમાંથી મુક્ત થાય, તેનામાં વૈચારક જાગૃતિ આવે અને લોકો વર્તમાન સમયને અનુરૂપ સુધારાઓ અપનાવીને ઝડપથી ઉત્કર્ષના પંથે આગળ વધે એ માટે અનેકવિધ સામાજિક –આર્થિક પ્રવૃત્તિઓ કરે છે. તેમાં સમાજયાત્રાઓ યોજીને સુધારાનો સંદેશ ઘેર ઘેર પહોંચાડવો, બાળલગ્ન-નાબૂદી અને લગ્નના ખોટા ખર્ચને સ્થાને સમૂહલગ્નો યોજવાં વગેરે પ્રવૃત્તિઓનો સમાવેશ થાય છે. આ ઉપરાંત મહિલા જાગૃતિ મંડળ દ્વારા મહિલાઓ આર્થિક રીતે આત્મનિરભર બને તે માટે વિવિધ પ્રકારની વ્યાવસાયિક તાલીમની તેમજ શ્રમજીવી બહેનો માટે અન્ય સ્વાવલંબનની પ્રવૃત્તિઓ દ્વારા મહિલા કલ્યાણના કાર્યો કરે છે. આ સંસ્થા યુવતિઓને આદર્શ ગૃહિણી અને આદર્શ માતાની તાલીમ મળે એ હેતુથી ગૃહિણીતાલમ શિબિરો પણ યોજે છે.